کراچی میں تشدد اور فائرنگ کے واقعات، دو بچوں سمیت چار افراد زخمی

شہر قائد کے مختلف علاقوں میں پیش آنے والے پرتشدد واقعات میں دو بچوں سمیت چار افراد زخمی ہو گئے جنہیں فوری طور پر قریبی اسپتالوں میں منتقل کر دیا گیا۔ پولیس کے مطابق شیریں جناح کالونی میں جھگڑے کے دوران تیز دھار آلے کے وار سے ایک شخص زخمی ہوا جسے سول اسپتال منتقل کیا گیا۔ زخمی کی شناخت 30 سالہ محمد آصف خان کے نام سے ہوئی ہے۔ دوسری جانب ڈیفنس فیز 8 کے علاقے خیابانِ شاہین ڈولی مال کے قریب فائرنگ کے واقعے میں 12 سالہ بچہ سفیان حسین زخمی ہو گیا جسے فوری طور پر جناح اسپتال منتقل کیا گیا۔ اسی طرح کیماڑی ٹاپو میں جھگڑے کے دوران تیز دھار آلے کے وار سے 25 سالہ سہیل زخمی ہوا جسے طبی امداد کے لیے سول اسپتال منتقل کیا گیا۔ ادھر سچل کے علاقے میں سیکیورٹی گارڈ کی فائرنگ سے 10 سالہ بچہ زخمی ہو گیا۔ پولیس نے فوری کارروائی کرتے ہوئے سیکیورٹی گارڈ پرویز کو گرفتار کر لیا اور اس کے قبضے سے اسلحہ بھی برآمد کر لیا۔