نیٹ فلکس شو تنازع: چینی شہری کو بزنس پارٹنر کے قتل کے جرم میں سزائے موت

چین میں ایک گیمنگ کمپنی کے اعلیٰ عہدے دار کو نیٹ فلکس سیریز کے تنازع پر اپنے ارب پتی بزنس پارٹنر کے قتل کے جرم میں سزائے موت دے دی گئی ہے۔

ژو یاؤ نامی شخص نے دسمبر 2020 میں ’یوزو گیمز‘ نامی کمپنی کے بانی لِنچی کے کھانے میں زہر ملا دیا تھا۔

یہ واقعہ اس وقت پیش آیا جب ان دونوں کے درمیان اس بات پر تنازع ہوا کہ لنچی نے ژو یاؤ کو اہم ذمہ داریوں سے ہٹا دیا تھا حالانکہ ژو یاؤ نے کمپنی کے نیٹ فلکس کے ساتھ ایک بڑا معاہدہ کروانے میں مدد دی تھی۔

39 سالہ لِنچی کرسمس کے دن مردہ پائے گئے۔ ان کی موت کے بعد ژو یاؤ کو گرفتار کیا گیا اور 2024 میں انہیں قتل کا مجرم قرار دے کر سزائے موت سنائی گئی۔

یوزو کمپنی کے پاس مشہور چینی سائنسی تخیلاتی ناول ’تھری باڈی پرابلم‘ کے فلمی حقوق موجود ہیں۔ ژو یاؤ اس کمپنی کے ایک ذیلی ادارے کے سربراہ تھے جو اسی ناول سے متعلق کاروبار دیکھتا تھا۔

رپورٹس کے مطابق ستمبر 2020 میں نیٹ فلکس نے اس ناول پر مبنی سیریز بنانے کے حقوق حاصل کیے۔

لِنچی کو اس پروجیکٹ کا ایگزیکٹو پروڈیوسر بنایا گیا جبکہ ’گیم آف تھرونز‘ کے تخلیق کار ڈیوڈ بینی آف اور ڈی بی وائز بھی اس میں شامل تھے۔

لِنچی نے 2018 میں ژو یاؤ کو ’تھری باڈی یونیورس‘ پروجیکٹ کا سربراہ مقرر کیا تھا، لیکن دو سال بعد جب انہوں نے کاروباری امور دوسرے افراد کے سپرد کیے تو دونوں کے درمیان اختلافات پیدا ہو گئے۔

کمپنی یوزو  نے ژو یاؤ کو 21 مئی کو سزائے موت کی تصدیق کرتے ہوئے کہا کہ ’ہم لِنچی کی وفات پر گہرے صدمے میں ہیں اور ان کے اہل خانہ سے دلی ہمدردی کرتے ہیں۔‘

کمپنی کے مطابق تمام ملازمین عدالتی عمل کی غیر جانبداری پر یقین رکھتے ہیں اور اس کا احترام کرتے ہیں۔

سیریز ’تھری باڈی پرابلم‘ نیٹ فلکس پر 2024 میں جاری ہوئی جس میں سائنس دانوں کی ایک ٹیم دکھائی گئی ہے جو اس بات کی تحقیق کرتی ہے کہ دنیا بھر میں سائنسی تجربات کیوں ناکام ہو رہے ہیں اور انسانیت کو ایک ممکنہ خلائی حملے کا سامنا کیوں ہے۔

اس کہانی میں ایک گروہ ’آکسفورڈ فائیو‘ کے نام سے شامل ہے اور ایک غیر روایتی جاسوس ’دا شی‘ بھی ان کی مدد کرتا ہے، جس کا کردار بینڈکٹ وونگ نے ادا کیا ہے۔

اس سیریز میں ایزا گونزالیز، جووان اڈیپو، جیس ہانگ اور جوناتھن پرائس شامل ہیں جبکہ بریڈ پٹ، روزامنڈ پائک اور رائن جانسن اس کے ایگزیکٹو پروڈیوسرز میں شامل ہیں۔