کراچی کے پلازہ میں آگ لگنے سے متعدد افراد زخمی، امدادی کارروائی جاری: ریسکیو حکام

کراچی میں ریسکیو حکام کے مطابق ہفتے کی شب ایم اے جناح روڈ پر ایک پلازے میں آتشزدگی سے متعدد افراد زخمی ہوئے ہیں۔

سرکاری میڈیا کے مطابق آگ لگنے کا واقعہ ایم اے جناح روڈ پر گل پلازہ کی دکانوں میں پیش آیا جس میں کم از کم سات افراد زخمی ہوئے ہیں جنہیں ہسپتال منتقل کر دیا گیا ہے۔

حکام کے مطابق فائر بریگیڈ کی گاڑیاں آگ پر قابو پانے کی کوشش کر رہی ہیں تاہم تاحال اس پر قابو نہیں پایا جا سکا ہے۔

انہوں نے مزید بتایا کہ زخمی ہونے والے افراد میں سے کچھ افراد کی بھگدڑ اور کچھ کی دھوئیں سے حالت خراب ہوئی۔

ریسکیو حکام کے مطابق متعدد افراد اب بھی پلازہ کے اندر موجود ہیں۔

دوسری جانب نجی ٹی وی چینل جیو نیوز کے مطابق اس واقعے میں اب تک ’دو افراد کے جان سے جانے اور 16 کے زخمی‘ ہونے کی اطلاعات ہیں۔ تاہم کسی سرکاری ادارے نے تاحال اموات کی تصدیق نہیں کی ہے۔

یہ کراچی میں دو دنوں میں پیش آنے والا دوسرا واقعہ ہے۔

اس سے قبل 16 جنوری کو کیماڑی ویسٹ ہارف میں کپڑے کے کنٹینر میں آگ لگی جس نے متعدد کنٹینرز کو اپنی لپیٹ میں لے لیا تھا۔