پی ایس ایل 11 فائنل شائقین کی موجودگی میں کھیلا جائے گا

پاکستان کرکٹ بورڈ کے چیئرمین اور وزیرداخلہ پاکستان سینیٹر محسن نقوی نے ہفتے کو اعلان کیا ہے کہ پاکستان سپر لیگ 11 کا فائنل شائقین کی موجودگی میں کھیلا جائے گا۔

انہوں نے اپنے ایکس پیغام میں لکھا کہ ’عزیز کرکٹ شائقین، میں نے وزیر اعظم شہباز شریف سے سٹیڈیمز میں تماشائیوں کی اجازت کی درخواست کی۔ وہ خود بھی شائقین کو اجازت دینے کی طرف مائل تھے۔

چیئرمین پی سی بی نے مزید بتایا کہ وزیراعظم نے زور دیا کہ فی الوقت پورے پاکستان میں کفایت شعاری کے اقدامات نافذ ہیں، اور ایندھن کی کھپت کو کم سے کم کرنے کی کوششیں جاری ہیں۔

’تاہم فرنچائز مالکان کی درخواست پر، انہوں نے پی ایس ایل 11 فائنل کے لیے شائقین کی موجودگی کو فیاضی سے منظور کر لیا ہے۔ میں اس فیصلے کے لیے اور شائقین کی سہولت فراہم کرنے کے لیے ان کا شکریہ ادا کرتا ہوں۔‘

پاکستان کرکٹ بورڈ (پی سی بی) نے 22 مارچ کو اعلان کیا تھا کہ خطے کی صورت حال اور اس کے نتیجے میں حکومتی کفایت شعاری مہم کے پیش نظر پاکستان سپر لیگ (پی ایس ایل) کے گیارہوں ایڈیشن کے میچ صرف لاہور اور کراچی میں بغیر تماشائیوں کے منعقد ہوں گے۔

فروری کے اختتام پر امریکہ اور اسرائیل کی ایران کے خلاف جنگ شروع ہونے کے بعد عالمی مارکیٹ میں تیل کی قیمتوں میں بے پناہ اضافہ ہوا ہے۔

پاکستان سپر لیگ 11 میں اس وقت 36 میچ ہو چکے ہیں جبکہ تمام ٹیموں نو نو میچز کھیل چکی ہیں۔

پوائنٹس ٹیبل پر پشاور زلمی 17 پوائنٹس کے ساتھ ناقابل شکست ہے جبکہ ملتان سلطانز 12 پوائٹنس کے ساتھ دوسرے نمبر پر ہے۔ اسلام آباد یونائیٹڈ 11 پوائنٹس کے ساتھ تیسرے نمبر پر ہے۔