پاکستان کے زیرِ انتظام کشمیر کے وزیراعظم کے خلاف تحریک عدم اعتماد کامیاب

پاکستان کے زیرِ انتظام کشمیر کے وزیراعظم چوہدری انوار الحق کے خلاف اسمبلی میں پیش کردہ تحریکِ عدم اعتماد پیر کو ووٹنگ کے بعد کامیاب ہو گئی ہے۔

پاکستان ٹیلی ویژن کے مطابق کھلی رائے شماری میں پیپلز پارٹی کے راجہ فیصل ممتاز راٹھور 36 ووٹ لے کر قائد ایوان بن گئے۔ تحریک کی کامیابی کے لیے 53 رکنی ایوان میں کم از کم 27 ووٹ درکار تھے۔

سپیکر چوہدری لطیف اکبر کی زیر صدارت آزاد کشمیر اسمبلی  کے اجلاس میں  وزیراعظم انوارالحق کے خلاف پی پی پی کے رکن اسمبلی قاسم مجید کی جانب سے تحریک عدم اعتماد پیش کی گئی۔

نئے وزیراعظم ممتاز راٹھور کی حلف برداری کل ہونے کا امکان  ہے۔

اس سے قبل ایوان سے خطاب میں وزیر اعظم آزاد کشمیر چوہدری انوار الحق نے کہا یہ کیسے ہو سکتا ہے ایک شخص ہی آئین اورانتظامی ڈھانچےکی تباہی کاذمہ دارہو ، کیا ان کی کابینہ کے ارکان اس کے ذمہ دار نہیں ہیں؟

جمعے کی دوپہر وزیر اعظم انور الحق کے خلاف عدم اعتماد کی قرارداد اسمبلی سیکرٹریٹ میں جمع کرائی گئی تھی۔ قرارداد پر 25 ارکان نے دستخط کیے تھے، جن میں 23 پی پی پی سے اور دو مسلم لیگ ن سے ہیں۔