خواتین کے ایشیا کپ 2026 کے گروپ اے کے ہفتے کو کھیلے گئے میچ میں انڈیا نے اپنی بہترین سپن بولنگ کی مدد سے پاکستان کو باآسانی سات وکٹوں سے ہرا دیا۔

آج دبئی میں انڈین سپنرز کی تباہ کن بولنگ کے سامنے پاکستان کی بیٹنگ لائن بری طرح ناکام رہی اور پوری ٹیم 18.1 اوورز میں صرف 55 رنز پر ڈھیر ہو گئی۔

انڈیا نے جواب میں مطلوبہ 56 رنز کا ہدف 8.4 اوورز میں تین وکٹوں کے نقصان پر حاصل کر لیا۔

انڈپینڈنٹ اردو کا واٹس ایپ گروپ یہاں جوائن کریں

پاکستان کی اننگز کی تباہی میں انڈیا کی 22 سالہ بائیں ہاتھ کی سلو آرتھوڈوکس سپنر شری چرانی نے مرکزی کردار ادا کیا۔

انہوں نے صرف سات رنز دے کر تین وکٹیں حاصل کیں اور  پلیئر آف دی میچ قرار پائیں۔

چرانی کو جون 2026 میں پہلی مرتبہ ٹی20 انٹرنیشنل کی عالمی نمبر ایک بولر بھی قرار دیا گیا تھا۔

ان کے ساتھ لیگ سپنر پریما راوت نے بھی نو رنز دے کر تین وکٹیں حاصل کیں جبکہ تجربہ کار آف سپن آل راؤنڈر دیپتی شرما نے  پانچ رنز دے کر دو کھلاڑیوں کو آؤٹ کیا۔

اوپنر شفالی ورما نے 10 رنز دے کر ایک وکٹ حاصل کی۔

پاکستان کی جانب سے شَواال ذوالفقار 14 رنز کے ساتھ سب سے زیادہ رنز بنانے والی بلے باز رہیں۔ انہوں نے 14 گیندوں کا سامنا کیا اور تین چوکے لگائے۔

وکٹ کیپر مُنیبہ علی نے 13 رنز بنائے جبکہ طوبیٰ حسن نے 16 گیندوں پر 9 رنز بنائے۔

اُمّ ہانی نے چھ، ایمن فاطمہ نے پانچ اور گُل فیروزہ نے صفر رنز بنائے۔

کپتان فاطمہ ثنا کوئی رن نہ بنا سکیں جبکہ عائشہ ظفر صرف دو اور سعدیہ شمس تین رنز بنا سکیں۔

پاکستان کی پوری ٹیم 18.1 اوورز میں 55 رنز پر آؤٹ ہوئی، جس کا رن ریٹ صرف 3.02 رہا۔

ہدف کے تعاقب میں انڈیا کو بھی ابتدا میں کچھ مشکلات کا سامنا کرنا پڑا۔ فاطمہ ثنا نے تین اوورز میں 17 رنز دے کر تین وکٹیں حاصل کیں۔

انہوں نے شفالی کو صرف چھ گیندوں پر 12 رنز بنانے کے بعد آؤٹ کیا، پھر سمرتی مندھانا کو 11 گیندوں پر نو رنز اور پرتیکا راول کو تین گیندوں پر چار رنز کے بعد پویلین بھیجا۔

لیکن 56 رنز کا معمولی ہدف ہونے کے باعث فاطمہ کی یہ عمدہ بولنگ پاکستان کو میچ میں واپس نہ لاسکی۔

انڈیا کی کپتان ہرمن پریت کور نے ذمہ دارانہ اننگز کھیلتے ہوئے 18 رنز بنائے اور ناٹ آؤٹ رہیں۔ ان کی اننگز میں ایک چوکا اور ایک چھکا شامل تھا۔

دیپتی نے بھی 12 رنز بنا کر کپتان کا ساتھ دیا اور دونوں نے مل کر ٹیم کو 8.4 اوورز میں ہدف تک پہنچا دیا۔

ہرمن پریت کے لیے یہ میچ ایک اور تاریخی موقع بھی تھا۔ وہ 150 ٹی20 انٹرنیشنل میچوں میں کپتانی کرنے والی دنیا کی پہلی کرکٹر بنیں، مردوں اور خواتین دونوں کرکٹ میں۔

انڈیا نے اس میچ کے ذریعے گروپ اے میں اپنی مسلسل تیسری فتح حاصل کی۔

وہ پہلے ہی سیمی فائنل کے لیے کوالیفائی کر چکا ہے جبکہ پاکستان کا اگلا گروپ میچ سات ستمبر کو ہانگ کانگ کے خلاف ہے۔