وزیرآباد: کیتھولک چرچ کے قریب حادثے میں 20 افراد زخمی، تین کی حالت تشویشناک

وزیرآباد کے علاقے مریم آباد میں ریسکیو حکام کا کہنا ہے کہ ایک تیز رفتار ٹرک سڑک پر کھڑے لوگوں سے ٹکرا گیا جس سے 20 افراد زخمی ہو گئے جن میں سے تین کی حالت تشویشناک بتائی جا رہی ہے۔

یہ حادثہ اتوار کی رات علی پور چٹھہ روڈ پر مریم آباد مین سٹاپ کے قریب پیش آیا، جہاں ایسٹر رسومات کے بعد قبرستان سے واپسی پر یہ افراد کیتھولک چرچ کے قریب سڑک کنارے موجود تھے۔

ریسکیو 1122 کے مطابق زخمیوں کو فوری طور پر ڈسٹرکٹ ہیڈ کوارٹر ہسپتال گوجرانوالہ منتقل کر دیا گیا، جہاں تین افراد کی حالت تشویشناک ہے۔

پولیس کے مطابق حادثے کے بعد سفید رنگ کا ٹرک (ڈالہ) قبضے میں لے لیا گیا ہے تاہم ڈرائیور موقع سے فرار ہو گیا، گاڑی کے ہیلپر کو گرفتار کر لیا گیا ہے۔

حادثے کے بعد علاقے کی مسیحی کمیونٹی نے سکیورٹی کی عدم فراہمی، واقعے کی تحقیقات اور ذمہ داروں کے خلاف کارروائی کا مطالبہ کیا ہے۔