مدینہ کے قریب عازمین کی بس کو حادثہ: انڈین سفارت خانہ

سعودی عرب میں انڈین سفارت خانے کا کہنا ہے کہ پیر کو عازمین کی ایک بس کو مدینہ منورہ کے قریب حادثہ پیش آیا ہے۔

انڈین سفارت خانے کے مطابق حادثہ رات کو پیش آیا۔

انڈٰیا کے وزیر اعظم نریندر مودی تعزیتی پیغام دیتے ہوئے ایکس پر لکھا ’مدینہ میں انڈین شہریوں کے ساتھ ہونے والے حادثے پر بہت دکھ ہوا ہے۔ میرے خیالات ان خاندانوں کے ساتھ ہیں جنہوں نے اپنے پیاروں کو کھو دیا ہے۔‘

انہوں نے مزید کہا کہ ’میں تمام زخمیوں کی جلد صحت یابی کے لیے دعاگو ہوں۔ ریاض میں ہمارا سفارت خانہ اور جدہ میں قونصل خانہ ہر ممکن مدد فراہم کر رہا ہے۔‘

انڈین میڈیا نے اس واقعے میں کئی افراد کے جان سے جانے کا دعویٰ کیا ہے تاہم سعودی حکام نے ابھی تک کوئی تعداد فراہم نہیں کی ہے۔

سعودی عرب میں 20 لاکھ سے زیادہ انڈین شہری مقیم ہیں جنہوں نے طویل عرصے سے یہاں کی لیبر مارکیٹ میں اہم کردار ادا کیا ہے۔