اسرائیل کوئی فوج بیروت نہیں بھیجے گا: ٹرمپ

امریکی صدر ڈونلڈ ٹرمپ نے پیر کو ٹروتھ سوشل پر پوسٹ کیا ہے کہ اسرائیل کوئی فوج بیروت نہیں بھیجے گا۔

انہوں نے لکھا کہ اسرائیلی وزیر اعظم بنیامین نیتن یاہو نے انہیں کہا ہے کہ اسرائیل بیروت میں کوئی فوج نہیں بھیجے گا، جبکہ جو فوجی دستے پہلے ہی روانہ ہو چکے تھے انہیں واپس بلا لیا گیا ہے۔

صدر ٹرمپ نے کہا کہ ان کی اسرائیلی وزیر اعظم بنیامین نیتن یاہو کے ساتھ ’انتہائی نتیجہ خیز‘ گفتگو ہوئی ہے۔

انہوں نے کہا کہ ’اسرائیل کی جانب سے بیروت میں کوئی فوج نہیں بھیجی جائے گی اور جو دستے راستے میں تھے انہیں بھی واپس موڑ دیا گیا ہے۔‘

ٹرمپ نے کہا ہے کہ اسرائیل حزب اللہ پر حملہ نہیں کرے گا اور حزب اللہ بھی اسرائیل پر کوئی حملہ نہیں کرے گی۔

اس کے ساتھ ہی انہوں نے اگلی پوسٹ میں یہ کہا ہے کہ ایران کے ساتھ مذاکرات تیزرفتاری سے جاری ہیں۔

قبل ازاں یورپی یونین نے بھی پیر کو اسرائیل پر زور دیا تھا کہ وہ لبنان میں اپنی فوجی کارروائیاں بند کرے۔

یہ مطالبہ ایسے وقت میں سامنے آیا جب اسرائیلی فوج نے سٹریٹجک اہمیت کے حامل اور تاریخی قلعہ شقیف پر قبضہ کر لیا اور جنوبی بیروت پر دوبارہ حملے شروع کرنے کا اعلان کیا۔

یورپی یونین کے ترجمان انوائر ال انونی نے کہا ’ہم اسرائیل سے مطالبہ کرتے ہیں کہ وہ لبنان میں اپنی فوجی کشیدگی کو روکے اور لبنان کی خودمختاری اور علاقائی سالمیت کا احترام کرے۔‘