متحدہ عرب امارات کی وزارت داخلہ نے جمعرات کو بتایا کہ ایک ٹرک بے قابو ہو کر سڑک پر متعدد گاڑیوں سے ٹکرا گیا جس کے نتیجے میں 14 افراد جان سے گئے اور مختلف ممالک سے تعلق رکھنے والے 30 شہری زخمی ہو گئے جن میں پاکستانی اور انڈین بھی شامل ہیں۔

یہ حادثہ امارت فجیرہ کے داخلی راستے پر واقع ایک سڑک پر پیش آیا۔ فجیرہ پولیس کے مطابق حادثے میں 18 کاریں اور پانچ ٹرک ملوث تھے۔

پولیس نے تصدیق کی کہ مرنے والوں میں اماراتی شہری بھی شامل ہیں جبکہ بعض افراد کی شناخت ڈی این اے ٹیسٹ کے ذریعے کی جا رہی ہے۔

انڈپینڈنٹ اردو کا واٹس ایپ گروپ یہاں جوائن کریں

آن لائن ویب سائٹ ’دی نیشن‘ کے مطابق زخمیوں میں اماراتی، عمانی، انڈین، برازیلی، پاکستانی، اردنی اور مصری شہری شامل ہیں۔

ہسپتال میں زیر علاج 30 زخمیوں میں سے 15 کو ڈسچارج کر دیا گیا ہے۔

وزارت داخلہ کے بیان کے مطابق ’ٹرک ڈرائیور سڑک پر سفر کے دوران گاڑی پر قابو نہ رکھ سکا، جس کے نتیجے میں ٹرک پہلے ایک دوسری گاڑی سے ٹکرایا، پھر الٹ کر سڑک پر ٹریفک کی سست رفتاری کے باعث رکی ہوئی متعدد گاڑیوں سے جا ٹکرایا۔‘

بیان میں بتایا گیا کہ حادثہ تقریباً نصف شب کے وقت پیش آیا۔

ٹکر کے نتیجے میں ٹرک میں آگ لگ گئی اور شعلے کئی دوسری گاڑیوں تک پھیل گئے جس کے باعث جانی نقصان زیادہ ہوا۔

پولیس، ایمبولینسز اور سول ڈیفنس کی ٹیمیں فوری طور پر جائے وقوعہ پر پہنچ گئیں اور زخمیوں کو طبی امداد فراہم کرنے کے بعد ہسپتال منتقل کیا۔

حکام نے عوام سے اپیل کی ہے کہ حادثے سے متعلق معلومات کے لیے صرف سرکاری ذرائع پر انحصار کریں اور افواہوں یا غیر مصدقہ اطلاعات پھیلانے سے گریز کریں۔

فجیرہ پولیس نے شہریوں کو ٹریفک قوانین کی پابندی، مقررہ رفتار برقرار رکھنے اور خصوصاً رش والے علاقوں میں گاڑیوں کے درمیان مناسب فاصلہ رکھنے کی ہدایت بھی کی ہے۔

دبئی میں انڈین قونصل خانے نے بتایا کہ مرنے والوں میں انڈین شہری بھی شامل ہیں۔

قونصل خانے نے آن لائن جاری کیے گئے ایک بیان میں کہا، ’قونصل خانہ سوگوار خاندانوں سے رابطے میں ہے اور انہیں ہر ممکن مدد اور معاونت فراہم کرنے کے لیے مقامی حکام کے ساتھ مل کر کام کر رہا ہے۔‘