پشاور زلمی نے پی ایس ایل 11 کے فائنل کے لیے کوالیفائی کر لیا

پاکستان سپر لیگ (پی ایس ایل) سیزن 11 کے کوالیفائر میچ میں منگل کو پشاور زلمی نے 70 رنز سے اسلام آباد یونائیٹڈ کو ہرا کر فائنل کے لیے کوالیفائی کرلیا۔

اسلام آباد یونائیٹڈ نے ٹاس جیت کر پشاور زلمی کو پہلے بیٹنگ کی دعوت دی، جس نے پہلے کھیلتے ہوئے سات وکٹوں کے نقصان پر 221 رنز بنائے۔

زلمی کے کپتان بابر اعظم نے 59 گیندوں پر 103 رنز بنائے۔ یہ رواں سیزن میں ان کی دوسری اور پی ایس ایل کیریئر میں چوتھی سینچری تھی۔

زلمی کے کوشال مینڈس 41 اور محمد حارث 35 رنز بنا کر نمایاں بلے باز رہے۔

اسلام آباد یونائیٹڈ کے شاداب خان نے زلمی کی تین، رچرڈ گلیسن نے دو اور سلمان مرزا نے ایک وکٹ لی۔

بعدازاں اسلام آباد یونائیٹڈ 18.4 اوورز میں تمام وکٹوں کے نقصان پر صرف 151 رنز بنا پائی۔

اسلام آباد کی ٹیم سے سمیر منہاس 44، محسن ریاض 25 اور عماد وسیم 22 رنز بنا کر سر فہرست رہے۔

زلمی کے آرون ہارڈی نے 3، محمد باسط علی نے 2 اور سفیان مقیم نے دو، دو وکٹیں حاصل کیں۔

اسلام آباد یونائیٹڈ کے پاس فائنل تک رسائی کا ایک اور موقع ابھی باقی ہے، جو جمعے کو پہلی ایلیمنیٹر کی ٹیم سے مقابلہ کرے گی۔