وزیراعظم شہباز شریف نے منگل کو گوگل کے گلوبل افیئرز کے نائب صدر ولسن وائٹ کے ساتھ پاکستان میں کمپنی کے دفتر کا افتتاح کردیا۔

وزیراعظم آفس سے جاری بیان کے مطابق ولسن وائٹ کی قیادت میں گوگل کے نو رکنی وفد نے اسلام آباد میں وزیراعظم سے ملاقات کی۔ امریکی سفارتخانے کی ناظم الامور نٹالی بیکر بھی وفد کے ہمراہ تھیں۔

وزیراعظم شہباز شریف نے کہا، ’’یہ بہت دلچسپ اور محض اتفاق ہے کہ آپ ایسے وقت میں پاکستان آئے ہیں جب ملک حکمرانی کے کئی شعبوں میں بڑے پیمانے پر ڈیجیٹل تبدیلی سے گزر رہا ہے۔‘

وزیراعظم نے کہا کہ پاکستان میں نوجوانوں کی بڑی تعداد موجود ہے اور یہ ملک کی قسمت بدلنے میں اہم کردار ادا کر سکتی ہے۔ انہوں نے کہا کہ پاکستان آئی ٹی کے شعبے میں بہت کچھ کر رہا ہے تاہم ابھی مزید کام کرنے کی ضرورت ہے۔

ولسن وائٹ نے گوگل کے وفد کی میزبانی پر وزیراعظم کا شکریہ ادا کرتے ہوئے پاکستان کا اپنا پہلا دورہ اور ملک میں گوگل کے مقامی دفتر کا افتتاح کو ’ایک بڑی پیش رفت‘ قرار دیا۔

انہوں نے کہا: ’گوگل ایک دہائی سے زیادہ عرصے سے پاکستان میں سرمایہ کاری کر رہا ہے اور اس کے لیے پُرعزم ہے اور مقامی دفتر کا افتتاح ایک بہت خاص موقع ہے۔‘

ولسن وائٹ نے کہا کہ وزیراعظم شہباز شریف کا پاکستان کو 30 ارب ڈالر کی آئی ٹی برآمدات کا مرکز بنانے کا عزم گوگل کے اہداف سے ہم آہنگ ہے۔

انہوں نے کہا کہ گوگل نے گذشتہ 10 برسوں کے دوران پاکستان کے مقامی کاروباروں اور گھرانوں کے لیے 3.9 ٹریلین روپے سے زیادہ کی معاشی سرگرمی میں کردار ادا کیا، جس سے 9 لاکھ 60 ہزار سے زائد ملازمتیں پیدا ہوئیں، تاہم یہ صرف ابتدا ہے۔

ولسن وائٹ کے مطابق گوگل تین طریقوں سے پاکستان کے 30 ارب ڈالر کی آئی ٹی برآمدات کے ہدف کو آگے بڑھا رہا ہے، جن میں پاکستانی افراد میں سرمایہ کاری، ہارڈویئر برآمدات کے لیے مینوفیکچرنگ اور انفراسٹرکچر میں سرمایہ کاری، اور مقامی کاروباروں میں سرمایہ کاری شامل ہیں۔

انہوں نے کہا کہ پاکستان کی ڈیجیٹل تبدیلی اس وقت تک اپنے بلند اہداف حاصل کرنے میں کامیاب نہیں ہو سکتی جب تک اس کے عوام میں مناسب سرمایہ کاری نہ کی جائے۔

ولسن وائٹ نے بتایا کہ گوگل نے کیریئر سرٹیفکیٹس کے ذریعے اور سکولوں اور اساتذہ کے ساتھ مل کر 10 لاکھ سے زائد پاکستانیوں کی ڈیجیٹل مہارتیں بہتر بنانے میں کردار ادا کیا ہے۔

انہوں نے مزید کہا کہ پاکستان کے تمام طلبہ کے لیے گوگل جیمینائی کی سبسکرپشن ایک سال کے لیے مفت کردی جائے گی۔